BERITA

Ulan Januari wingi, wong Lamongan dihebohno kasus penipuan investasi bodong sing dilakokno bocah wedok asli Turi, Zahrotul Bilad. Bocahe isih nom, umure selikur tahun, tapi kok yo wis puinter mbujuki wong. Teko hasil nipu korbane, Zahrotul iso tuku omah sing regane meh sak milyat, montor 2, karo perhisan emas.

Ulan Februari wingi, Indra Kenz, yutuber kondang asli Medan, ditangkep pak pulisi mergo kasus penipuan berkedok trading saham nang aplikasi Binomo. Umure yo isih nom, nemlikur tahun. Bocahe yo selama iki terkenal sugih mbrewu. Opo-opo jarene “murah banget”. Montor Tesla wae jarena murah banget. Opo maneh Tossa.  Padahal awak dewe tuku Skupi wae kudu kridit telung tahun.

Durung mari kasus Indra Kenz, awal ulan Maret iki lha kok ono kasus podo maneh. Doni Salmanan, yutuber asli Bandung, ditangkep pak pulisi mergo kasus penipuan berkedok trading nang aplikasi Quotex. Bocahe yo isih nom, baru patlikur tahun, seneng pamer aksi andum-andum duwik. Nalika Gunung Semeru mbledhos wingi, bocahe nyumbang ora kiro-kiro, rong milyat coy. Iku duwik iso dienggo nggawe kafe koyok Aola Paciran.

Zahrotul Bilad, Indra Kenz, Doni Salmanan podo-podo isih nom, tapi wis puinter mbujuki wong. Podo-podo ngakune trading saham. Podo-podo seneng mamerno duwik kanggo njiret korban.

Urusan duwik iki memang ora pernah mboseni. Ono wae kedadeane. Ono sing lucu. Ono  sing nggarai mangkel sampek misuh-misuh.

Jarene Albert Einstein, kertas memang iso mantulno cahaya. Lha buktine, duwik iso nggawe moto bunar. Silao. Moto nik wis kadung bunar, nyetir opo wae gampang nubruk, gampang tibo. Gampang mbujuki. Gampang dibujuki.

Lha contone penipuan nang Lamongan iku. Mosok ono duwik sakjuta ora sampek sak ulan iso manak mangatus ewu? Tuyul wae kalah. Lha ngono yo isih akeh sing percoyo. Iku kan cuma muter duwik anggota baru wae. Duwik teko anggota baru diwehno anggota lawas. Jenenge skema Ponzi. Iki modus penipuan sing umure wis satus tahun.

Nduwe duwik akeh memang enak. Iso nyah-nyoh-nyah-nyoh. Tapi tinimbang diinvestasikno nang trading saham sing ora ono wujute, luwih manfaati nik disilihno model bagi hasil nang pedagang-pedagang cilik. Contone, bakul kliling sayur bothekan pawon. Tukang  omprengan sing durung nduwe sepeda montor dewe. Tukang tambal ban. Utowo bakul es degan.

Mungkin bagi hasile ora sepiro. Tapi iku luwih manfaati. Mergo investasi sing paling manfaat iku, jarene Pak Yai Zarqoni, “likay la yakuna dulatan baynal aghniya”. Supoyo duwik iku ora cuma muter-muter nang nggone wong sugih tok.

BACA JUGA:

Pamer Udel Soto Ayam, The Lamongan Way of Life Keributan di Kafe Aola dan Wajah Koplo Pantura debby kurniawanDebby Kurniawan dan Trial by Netizen Lowongan CPNS Lamongan 2023 (Bagian 1: Prosedur) Santri Lamongan Meninggal: Prasangka, Dugaan, dan Fakta Hukum Sejarah PKI, Masyumi, dan NU di Lamongan Kabar Buruk, KPK Buka Cabang di Lamongan Wanita Lamongan Melamar Pria, Bukan Soal Jual Mahal PT Buildyet Indonesia (Puma Lamongan): Lowongan Kerja, Gaji, dll Gamelan Sendang, dari Paciran ke Mancanegara 2 Cara Membuat Website Murah dan Mudah buat Pemula Wisata Kuliner Rujak Cemplang OBAT MUNTAH Jasa Sedot WC Se-Kabupaten Lamongan Polisi Lamongan Spesialis Razia Gelandangan